Dldp prezanton qasjen e tij për sektorin e mbetjeve në Komitetin Ndërministror

Dldp prezanton qasjen e tij për sektorin e mbetjeve në Komitetin Ndërministror 

Dldp mori pjesë në mbledhjen e parë të Komitetit ndërministror për mbetjet për vitin 2015. Në këtë takim, dldp pati mundësinë të prezantojë qasjen e programit për gjithë sektorin e mbetjeve dhe veçanërisht për hartimin e një sistemi benchmark-u si dhe nevojën e një Enti Rregullator për mbetjet dhe funksionet shtesë që duhet të ketë ai për këtë sektor.  Në emër të dldp, Arben Kopliku, prezantoi mundësitë që eksperiencat e deritanishme të dldp-së ofrojnë për sektorin e mbetjeve. “Aplikimi i modelit të dldp për llogaritjen e kostos dhe tarifave ëshë një hap i rëndësishëm në vendosjen e standarteve të shërbimit. Modeli lejon krahasime dhe monitorime në nivel nacional dhe mundëson zvogëlimin e shkallës së rrezikut të korrupsionit në sektor”- tha në prezantimin e tij z. Kopliku. Gjithashtu, indikatorët kryesorë  të shërbimit të cilët do të përbëjnë edhe bazën për krijimin e një sistemi benchmark-u iu prezantuan anëtarëve të Komitetit. Prezantimi i propozimeve të dldp për kompetencat rregullatore që duhet të këtë ERRU në gjithë sektorin e mbetjeve, jo vetëm tek trajtimi, por edhe grumbullimi dhe transporti i mbetjeve të ngurta si dhe  kompetenca në përcaktimin e metodologjisë së llogaritjes së kostos dhe tarifës së grumbullimit dhe transportit të mbetjeve të ngurta zgjuan shumë interes tek anëtarët dhe të ftuarit në takim.

Komiteti  i  Menaxhimit  të  Integruar  të  Mbetjeve,  me  anë  të  anëtarëve  të  tij  pranë ministrive,  siguron  që  çdo  ministri  të  ketë  një  politikë  të  përbashkët  dhe  të  unifikuar  për administrimin e mbetjeve dhe mbrojtjen e mjedisit. Komiteti i Menaxhimit të Integruar  të Mbetjeve bashkërendon detyrat e ministrive për menaxhimin e integruar mjedisor të mbetjeve në Republikën e Shqipërisë. Ky Komitet zhvilloi mbledhjen e tij të parë për vitin 2015, nën drejtimin e znj. Olijana Ifti, zëvendësministre e  Mjedisit. Pjesëmarrës në këtë takim ishin zëvendësministrat e ministrive të linjës, si dhe donatorë e programe që veprojnë në fushën e menaxhimit të mbetjeve si dhe përfaqësues të shoqërisë civile.

Zv. ministrja Ifti theksoi se linjat kryesore ku Ministria e Mjedisit  ka përqendruar punën e saj për të  përmirësuar situatën në drejtim  të menaxhimit të mbetjeve të ngurta janë: hartimi i një legjislacioni të harmonizuar midis sektorëve specifikë, qartësimi i detyrave të pushtetit qendror dhe atij vendor, nxitja e partneriteti publik privat si dhe zbatimi i skemave të grumbullimit dhe ndarjes së mbetjeve në burim. Edukimi i publikut dhe aplikimi i parimit “Ndotësi paguan”,  janë një tjetër drejtim për të përmbushur standardet mjedisore në administrimin e mbetjeve.” – tha znj. Ifti. Ajo evidentoi pamundësinë që me financat aktuale të mund të arrihen objektivat e vendosura në Strategjinë Kombëtare. Para anëtarëve të Komitetit Ndërministror, z. Mihallaq Qirjo prezantoi rekomandimet dhe propozimet e takimit të dt. 18. 11. 2014 të grupit këshillimor të mbetjeve. Znj. Alba Dakoli Wilson prezantoi para grupit rezultatet e një misioni identifikimi të nevojave në fushën e menaxhimit të mbetjeve, mbështetur nga qeveria zvicerane nëpërmjet SECO-s.  Z. Redi Baduni, prezantoi  konceptin e Ministrisë së Mjedisit për Krijimin e Fondit Mjedisor.  Në fund të mbledhjes Komiteti përcaktoi planin e punës dhe aktivitetet sensibilizuese për vitin 2015. Mes aktiviteteve kryesore të parashikuara gjatë vitit 2015, janë edhe iniciativat e dldp për dhënien ERRU-së të funksionit të aprovimit të metodologjisë për llogaritjen e kostos dhe tarifave,  kampionati i riciklimit dhe aplikimi i metodologjisë për vendosjen e standarteve të shërbimit.